السؤال اللي بيوصلنى بمعدل ٣ مرات في اليوم
هجاوبه هنا بدل ما أجاوب كل واحد في رسالة كل يوم …

س. إيه المصادر الآبائية اللي فيها تجميع لكتابات الآباء ؟

بص لو انت مش من ال٩٩.٩٩% من المصريين اللي ميعرفوش يتكلموا يوناني ولاتيني وسرياني وقبطي، فالمصادر الأولية هي:

١. باترولوجيا جريكا Patrologia Graeca :

ديه تجميعة يونانية لكتابات الآباء اللي كتبوا باليونانية (آباء الشرق) … عددها ١٦١ مجلد، وبتغطي ١٥ قرن … في الاقتباسات المرجعية بتاخد رمز PG

٢. باترولوجيا لاتينا Patrologia Latina :

ديه تجميعة لاتينية لكتابات الآباء اللي كتبوا باللاتينية (آباء الغرب) … عددها ٢١٧ مجلد، وبتغطي ١٠ قرون … في الاقتباسات المرجعية بتاخد رمز PL

٣. باترولوجيا اورينتالس Patrologia Orientalis :

ديه تجميعة لمتفرقات كتابات آباء بلغات تانية زاي السريانية والقبطية والارمنية (آباء شرق برضو وديه كتاباتهم اللي مش باليونانى، اللي هي كتابات “محلية”، لان اليوناني كان اللغة المسكونية لآباء الشرق) … عددها ٤٩ مجلد، وبتغطي متفرقات زمنية …. في الاقتباسات المرجعية بتاخد رمز PO
______________

طيب افرض انك منتش من نسبة : ٠،٠١% اللي يعرفوا اللغات ديه ؟
الحمد لله، عندنا ترجمات غير مكتملة للسلاسل ديه باللغتين الانجليزي والفرنساوي، هقولك هنا على أشهرهم لو حابب تقرا في الآبائيات

١. Ante-Nicene Fathers و Nicene and Post-Nicene Fathers

ديه الترجمة الانجليزية الاشهر على الإطلاق، ديه حوالى ٣٨ مجلد لو استثنينا مجلدات الاشارات المرجعية (index & references) .. لغتها إنجليزي …. ومتقسمة على تلات سلاسل، الاول ANF والتاني NPNF1 والتالت NPNF2 … موجودة مجانا اونلاين، فيها عيبين الاول ان لغتها كلاسيكية، وتانيها ان التلات سلاسل للمجموعة مفيهاش نصوص لقديس بحجم وبزخم كتابات للق. كيرلس السكندري اطلاقا

٢. Les Sources Chrétiennes

ديه الترجمة الفرنسية الاشهر، وانا شخصيا بعتبرها المفضلة عندي، بتتكون من اكتر من ١٣٨ مجلد (بعضها توقف اصداره، فصعب توصل لعددها بدقة)، لآباء شرقيين وغربيين من عصور مختلفة، بعضهم مشهور وبعضهم غير مشهور، ميزتها ان في بعض اجزاءها ترجمت كتابات لآباء اتفقت الكنائس التقليدية على انهم اصحاب بدع، فهى كنز آبائي لأى حد عايز يدرس الخلافات الآبائية التاريخية، وال context اللي نشأت فيه، كمان بتحط النص اليوناني او اللاتيني في مواجهة الترجمة في عمودين … بيرمزلها في الابحاث ب SC… مجلداتها تقدر تشتري نسخ ديجيتال منها بسعر رخيص وتقدر كمان تشتري منها نسخ مستعملة برخص التراب (نسخي الشخصية منها مستعملة ومقابلتنيش معاها مشاكل كواليتي)

٣. Fathers of the Church (by Catholic University of America (CUA) Press)

ترجمة إنجليزية لغتها حديثة، مكونة من ١٢٧ مجلد، لآباء كتير، ميزتها سهولة اللغة لو قارناها بال ANF-NPNF1/2 اللي كانت لغتها إنجليزية كلاسيكية ، وتعتبر الاغلى في الترجمات، المجموعة هتكلفك ديجيتال حوالي الفين ونص دولار (بس تقدر تشتري الأجزاء اللي تهمك منها زاي حالاتي) ، ومعظم مجلداتها توقف طباعتها مع الاكتفاء ببيع النسخ الديجيتال بس لارتفاع اسعار الطباعة والنقل للمجموعة … بيرمزلها في الابحاث ب FC

______________

طيب افرض انك لا تعرف انجليزي ولا فرنساوي كمان ؟ ومتعرفش غير عربي
في الحالة ديه قدامك حاجة من التلاتة دول

١. المركز الارثوذوكسي للدراسات الآبائية، مؤسسة القديس انطونيوس

ده مركز فيه العديد من دكاترة الابائيات واللغات الاصلية، بيترجم النصوص الابائية وبينشرها بالعربي في صورة كتب صغيرة او مجلدات، ترجماتهم مميزة ودقيقة ، يعيبه ان احيانا المترجم بيحط حواشي تبريرية للنص عشان يتفادى يدخل في صراع مع مسئولي التعليم في الكنيسة القبطية، بس في المطلق هم الانشط والادق في مجال الترجمة الابائية للعربي

٢. دار نشر بناريون

بناريون بتترجم كتابات ابائية للعربي، وبتقدم ابحاث ابائية كمان، رغم انهم مقلين في اصداراتهم، بس لما بيصدروا كتاب، بيتناولوا مش بس الترجمة ولكن بحث كامل ودقيق للخلفية التاريخية والحضارية للكاتب والنص، كتبهم موجودة في معظم المكتبات القبطية

٣. الجبل المقدس (دار نشر انطاكية)

الجبل المقدس بيعتمد على نشر وتوزيع الترجمات العربية للكتابات الابائية اللي قام بيها الشوام، سواء من لبنان او سوريا، كتاباتهم مقلة، لان دخول الكتب من البلاد التانية لمصر مش سهل والامكانيات والتسهيلات جوة مصر شبه منعدمة عشان تساعدهم، برغم كده كتبهم مميزة وفيها طابع ابائي اصيل

فيه تفاصيل اكتر، وفيه مصادر تانية، بس انا حبيت اركز على اشهر تلاتة من كل مجموعة، للي عايز يبتدي ويدرس، بدل من الاعتماد الكلى على اقتباسات مقتطعة من كتابات القمص تادرس يعقوب ملطى، والظن بإن بالعبارات المقتطعة ديه من سياقها في تفسيره ممكن ندرس الفكر الابائي زاي ما كتير من الاقباط ومسئولي التعليم فاكرين انهم بقراءتهم المقتطفات من تفسيره يبقى هم فاهمين الفكر الآبائي …..

ادرس واقرا واتعلم … مفيش وسيلة تانية !!! … ولا فيه معرفة بتتقدم للواحد بالمعلقة على اطباق من دهب … لو مهتم ابتدي من دلوقتي اقرا، وخللى عندك صبر، مفيش حاجة بتت master من يوم وليلة

#الحل_تنويري_آبائي
اشرف بشير