مراجعة كتاب الوصية والميراث عند الأقباط – ماركو الامين
محتويات الكتاب او المقال
Toggle![مراجعة كتاب الوصية والميراث عند الأقباط للدكتور محمدي فتحي محمد - مراجعة ماركو الامين 1 مراجعة كتاب الوصية والميراث عند الأقباط](/wp-content/uploads/2023/03/20230304_105459.jpg)
مراجعة كتاب الوصية والميراث عند الأقباط
من خلال النصوص القبطية
من القرن السابع و حتى القرن الحادي عشر الميلادي
الدكتور محمدي فتحي محمد
مراجعة ماركو الامين
كتاب (الوصية والميراث عند الأقباط) وهو دراسة منشورة ضمن سلسلة كراسات قبطية، وهى سلسلة underrated جداً وللأسف معليهاش ضوء او دعاية كتير بالرغم من عظمة الدراسات اللى بتتنشر فيها ومجهولة بالنسبة لكتير من الباحثين.
سلسلة كراسات قبطية هى ذراع نشر لمركز الدراسات القبطية بمكتبة الاسكندرية
الدراسة تقع فى ١٠٣ صفحة بجانب الملاحق هى صغيرة لكن مكثفة وقوية وهى مختصر لرسالة الدكتوراة التى قدمها مؤلف الكتاب دكتور محمدي فتحي، بيبدأ الدكتور بالمقدمة عن موضوع البحث اللى استخدم فيه عدد لا بأس به من نصوص الوصايا القبطية وقسمهم لقسمين قسم بيدرس فيه وصايا الرهبان وقسم بيدرس فيه وصايا غير الرهبان العلمانيين العاديين.
فى وصايا الرهبان اللى مهمة جداً لأنها بتؤرخ لأديرة مندثرة من القرن التاسع الميلادى او العاشر بحد اقصى وهى اديرة منطقة قرية چيمى التابعة لأقليم ارمنت جنوب مصر مثل دير فويبامون (فام او بفام) ودير إبيفانيوس وغيرهم من اديرة وكنائس المنطقة وبتؤرخ لتسلسل رؤساء الاديرة ومواردها وممتلكاتها وطريقة اختيار رئيس الدير وصلاحياته الاقتصادية وتكوين الاديرة.
اما بقي وصايا العلمانيين فتعتبر سجل لحياة المجتمع المصري الصعيدي من القرن السابع الميلادي للقرن الحادي عشر والاقباط كانوا بيورثوا ازاى على حياة عينهم مثلا كتير منهم كان يورث الولاد مش البنات ورغم كده وصلتلنا وصايا كتير من نساء تملك وتورث وتختار مين هيورث منها ومين لا وليه.
وفى الجزء الأخير بعد سرد للوصايا فى دراسة عاملها دكتور محمدي لتحليل نصوص الوصايا القبطية والصيغ والمحتوى بتاعها.
أخيراً برشح جداً مش بس الكتاب اللى مهم جداً لكن السلسلة كلها لأي حد مهتم يقرأ عن تاريخ الاقباط والمجتمع المصري وخاصة فى القرن السابع والثامن الميلادي.