ملخص كتاب كيف اتعرف علي مشيئة الله للراهب سارافيم البراموسي – خدمة Read w Estafeed

 

من هنا يمكنك تحميل كتاب كيف اتعرف مشيئة الله

الحلقة الاولي: من ملخص كتاب كيف اتعرف علي مشيئة الله للراهب سارافيم البراموسي..

كلنا بندور وبنسأل نفسنا يا تري ايه هي مشيئة ربنا في حياتي ؟!

وفي الغالب بنكون مستنين علامة واضحة من ربنا زي ما عمل جدعون أو ملاك يظهرلنا يقولنا نعمل ايه بالظبط أو ورقة من ربنا نفتحها ونعرف من خلالها ايه هي إرادته !

أو ساعات بنكون محتاجين ضمان إلهي علي اختيار احنا اللي اخترناه في لاوعينا الباطن، ويكون ربنا بالنسبة لنا هو ضامن للقرار بدل ما يكون صانع القرار .. ولو فشل اختيارنا نحمله هو المسئولية..

ولو ربنا مردش علينا بإجابة واضحة وسريعة لطلبنا بنكون دايما قلقانين لنعمل حاجة تكون عكس مشيئته !

بس لو كانت المسيحية مصدر لقلق الانسان ف أكيد مش هي دي مسيحية الرب يسوع المتجسد واللي كان بيدعو بعدم القلق لان استحالة مشيئة ربنا تأخد الإنسان إلي مكان لا تحفظه فيه النعمة..

في الكتاب المقدس بنشوف وجهتين لمشيئة الله في حياة الإنسان:

الوجهة الأولي وهي الوجهة العامة لكل الخليقة ولكل البشر بأن يخلصوا ويعودوا إلي حضن الآب..
“الَّذِي يُرِيدُ أَنَّ جَمِيعَ النَّاسِ يَخْلُصُونَ، وَإِلَى مَعْرِفَةِ الْحَقِّ يُقْبِلُونَ.” (1 تي 2: 4).

اما الوجهة التانية لمشيئة الله في حياة الإنسان بتكون في إطار دعوة الانسان الشخصية، ربنا محتاج مني اعمل ايه في حياتي ؟ ادخل كلية ايه ؟ اسافر ولا لأ ؟ اختار الشغلانة دي ولا بلاش ؟ وهكذا..

كلها بتكون قرارات محورية وقدامها الذهن بيبدأ يسأل ” كيف اعرف مشيئتك يا الله ؟ “

في المرات اللي جاية هنتعرف علي 8 حقائق هتساعدنا ازاي نفكر من جهة مشيئة الله..
كل يوم خلال الاسبوع هننزل حقيقتين مع بعض..
استنونا بكرة مع حلقة جديدة من ملخص كتاب كيف اتعرف علي مشيئة الله

الحلقة الثانية من ملخص كتاب كيف اتعرف علي مشيئة الله للراهب سارافيم البراموسي..

 

١. نتعرف علي الله كما أعلنه الإنجيل بوضوح في المسيح :
لو عايز تعرف مشيئة ربنا من غير ما يكون ليك علاقة معاه ف كل المحاولات اللي هتعملها مش هتوصلك لإرادته الحقيقية..

ف أول حاجة لازم نعملها هي اننا نتعرف علي ربنا كويس عشان نقدر نعرف مشيئته..
وهنا مش بنتكلم عن المعرفة العقائدية بالله فقط انما بنقصد برضه المعرفة الحية..

بمعني اننا نطلب منه انه يعرفنا ذاته كل يوم .. انه يسكن جوانا .. اننا نتكلم معاه مش لمجرد إن احنا محتاجين طلبات أرضية هو يحققها لنا انما احنا محتاجينه هو يملك علي كل حياتنا..

حاول انك متضيعش اي فرصة في انك تتعرف عليه من خلال محاضرات .. خلوات .. عظات .. قداسات..

كمان حاول ترصد علاقتك بالاخر وميكونش فيها اي إدانة او سخرية او ايذاء للآخر لانها بتنعكس علي علاقتك ب الله..

٢. تعرف علي ذاتك :
وعلشان نتعرف علي الذات هنعدي مع بعض علي شوية محاور..

اول واحد: انك مخلوق حسن جداً بلا عيب.. مخلوق علي الصورة الالهية..

بالرغم من إن الشيطان بيحاول كل يوم يقنعنا ان احنا وحشين ومافيش فينا أمل نكون صورة الله المخلوقين عليها ولكن دي بتكون خدعة شيطانية لازم ناخد بالنا منها كويس..

تاني محور: هو انك تتعرف علي اللي دخل عليك من قيود وخطايا وأثرت فيك وغيرت من اصلك الحقيقي..
اتعرف علي ايه اللي غيرته الخطية فيك عشان تبدء رحلة استعادة كيانك الاصلي قبل السقوط..

المحور التالت: اعرف ايه هي الإمكانيات والمواهب اللي ادهالك المسيح عشان تستخدمها وتكون عضو حي فاعل في جسد الكنيسة..
وكل ما اتعرفت علي ذاتك كل ما هتعرف تعيد ترتيب أولويات حياتك بطريقة أفضل..

في شوية حاجات برضه تقدر انها تساعدك تتعرف علي ذاتك..
زي مثلا الصلاة الصادقة النابعة من القلب اللي تحس فيها بحضور الله..
زي قراءة الكتاب المقدس بشغف للتغيير من خلال الفهم الروحي..
أو انك تمارس سر الاعتراف بوعي وبطريقة سليمة لانه بيساهم بشكل كبير في انه يكشف عن ذاتك الحقيقية..
واخر حاجة اسمع كويس عن ايه اللي بيقولوه الناس عنك وحلله بشكل موضوعي..

 

 

الحلقة الثالثة من ملخص كتاب كيف اتعرف علي مشيئة الله للراهب سارافيم البراموسي..

 

حدد نقاط ارتكازك في الحياة :

ببساطة احنا لما نعيد ترتيب اولوياتنا، ف احنا كدا بنحط نقاط ارتكاز جديدة لحياتنا هي اللي هنبدء ننطلق منها..

ولما بنيجي نحط نقاط ارتكاز مبنية علي اساس معرفتنا بـ الله الحقيقي ومعرفتنا بـ ذاتنا الحقيقية ف احنا كدا بدأنا ف تحقيق ارادة الله في حياتنا..

يعني مثلا بدل ما كل طموحي اني ادخل كلية معينة هيبقي طموحي الجديد ازي اعلن عن ربنا اللي بحبه من خلال حياتي..

وبدل ما كان كل التساؤل حوالين اتجوز دي ولا دي هيبقي طموحي مشغول بأني عايز ابني كنيسة صغيرة تشع بحب ربنا لكل اللي حواليا.. 

انصت للروح القدس الساكن فيك  :

الروح القدس رقيق ووديع جدا..صوته هاديء..

مبيفرضش نفسه ولا بيغصبك انك تعمل حاجة عكس مشئيته..

بيفضل يتكلم وبيعلن ليك عن ايه اللي المفروض تعمله.. 

ولكن باستمرار رفضنا لصوت الروح القدس اللي جوانا وتجاهلنا لنداءاته في كتير من المواقف..

بنصاب بالصمم الروحي.. والنتيجة هي اننا مبقناش عارفين نميز صوت الروح القدس من صوت الروح القدس الزائف ( الشيطان) 

فمن المهم اننا نتدرب علي اننا نسمع للروح القدس وطاعته المستمرة في كل الاوقات..

علشان لما نكون  محتاجين ناخد قرار مهم في حياتنا تكون آذانا مدربة علي تمييز صوت الروح القدس..

 

الحلقة الرابعة من ملخص كتاب كيف اتعرف علي مشيئة الله للراهب سارافيم البراموسي..

 

اختزن خبرات حية في علاقتك بالله :

ببساطة خزن كل المواقف اللي ربنا كان وقف معاك فيها في مذكرة او نوتة روحية..

سواء كانت مواقف في الشغل او الدراسة او في الحياة عامة..

 

طب ايه علاقة دا بمعرفة مشيئة ربنا !

ساعات احنا بنمر ب فتور روحي بشكل مؤقت وفي نفس الوقت بنكون محتاجين ناخد قرارات مهمة..

ف ترجع تفتح النوتة دي وتسترجع عمل الله معاك وازاي اتدخل وحل مشاكلك .. ازاي كنت في حيرة وقت الصلاة والامر في الاخر اتحل بإيد ربنا..

تفهم دور الصلاة :

لما بنكون محتاجين مشئية الله في قرار معين ف اول حاجة بنعملها هي الصلاة..

وهنا محتاجين نركز علي كام نقطة مهمين اوي اوي..

ربنا مش بيرد علينا في الصلاة بإجابات جاهزة ولكن بيدينا رؤية سليمة للأمور .. بيساعد اننا نحط اولوياتنا بالطريقة الصح.. بيساعدنا ان يكون قرارنا معبر فعلا عن مشئيته..

ربنا مش هو اللي هياخد القرار .. احنا اللي بناخد القرار واحنا المسئولين برضه عن نتائج قرارتنا..

ولكن ربنا دايماً في ضهرنا علي استعداد انه يعدل نتائج قرارتنا السيئة لو قربنا منه اكتر وخليناه في مركز حياتنا..

اخر واهم نقطة : استمرارية صلاتك مش مهناها ان ربنا هيحقق مشيئتك انت، بالعكس دور الصلاة بيساعد علي تحقيق مشيئة ربنا في حياتك..

 

الحلقة الخامسة من ملخص كتاب كيف اتعرف علي مشيئة الله للراهب سارافيم البراموسي..

 

تعلم معني الخضوع للمشيئة الالهية..

 الخصوع لله مش معناه انك متحاولش  او ان ميكونش عندك طموح او هدف..

او انك تتوقف عن الحركة والعمل وتقول انا هخضع لمشيئة الله..

بالعكس الخضوع معناه انك تعمل كل اللي تقدر عليه وتسيب النتيجة بكل ايمان وثقة في ايد ربنا..

 كمان الخضوع لله لازم يكون مبني علي ثقتك فيه اكتر من اي حاجة تاني..

الثقة دي يعني  انك تحط كل أفكارك ومخططات حياتك في ايده وواثق في محبته وقدرته..

تسلح بالصبر :

ببساطة  الصبر  أداة بيحتاجها اي انسان في الحياة عامة..

فهو مش مجرد مطلب مسيحي ولكن مطلب انساني بيحتاجه الانسان علشان ينجح في اي عمل..

 ف مشيئة الله محتاجة صبر في حياتنا.. كمان استجابة ربنا لصلاتنا محتاجة صبر..

ولكن صبر الله مش بيدعونا اننا نكون متكاسلين او اننا نتوقف عن عمل وصاياه..

بالعكس نصبر واحنا مطيعين للوصية.. نصبر واحنا بنتعرف علي ذواتنا.. نصبر واحنا مطيعين لنداءات الروح القدس.. نصبر واحنا كمان بنتعرف علي الله وخاضعين له..

انْتَظِرِ الرَّبَّ وَاصْبِرْ لَهُ

وَلاَ تَغَرْ مِنَ الَّذِي يَنْجَحُ فِي طَرِيقِه

مِنَ الرَّجُلِ الْمُجْرِي مَكَايِدَ.

مز 37 : 7

الي هنا انتهى ملخص كتاب كيف اتعرف علي مشيئة الله للراهب سارافيم البراموسي 

خدمة Read w Estafeed

رابط لصفحة الخدمة :https://www.facebook.com/read.w.Estafeed.1

من هنا يمكنك تحميل كتاب كيف اتعرف مشيئة الله